1Ki 11 | ZomZIV | STEP | Solomon in Pharaoh tanu banah gamdang numei tampi - Moab-te, Ammon-te, Edom-te, Sidon-te le Hit-te a ngaih beh lai hi.

1 Kings 11

Solomon’ Zite

1 Solomon in Pharaoh tanu banah gamdang numei tampi - Moab-te, Ammon-te, Edom-te, Sidon-te le Hit-te a ngaih beh lai hi. 2 TOPA in Israel-te tungah, “Amaute tawh kiteng thuk peuhmah kei un, bang hang hiam cih leh amaute in na lungsim uh amau pasiante lamah hong hei taktak ding uh hi,” ci-a a gen minamte amaute ahi uh hi. Tua hi napi Solomon in amaute a ngai cinten hi. 3 Amah in kumpi tanu za sagih zi-in nei a, zino za thum a nei hi; tua hi-a, a zite in amah lam a khialsak hi. 4 Solomon lah tek ta a, a zite in a lungsim amau pasiante lamah heisak uh a, a pa David lungsim a kho zahin TOPA ama Pasian lamah a lungsim bupin a ki-ap zo nawn kei hi. 5 Amah in Sidon mite nusian Ashtoreth le a kihhuai Ammon mite pasian Molech ^{▼▼11.5 Hebrew in Milcon tg. 33 ah zong} a zui hi. 6 Tua ciangin Solomon in TOPA mit ah a sia gamta hi; a pa David hihsa zahin amah in TOPA nung ciantakin a zui kei hi. ^b

7 Solomon in Jerusalem nisuahna lam mualtung khatah a kihhuai Moab pasian Chemosh le a kihhuai Ammon pasian Molech adingin munsang khat a bawl hi. 8 Amah in a gamdang zite - gimnamtui hala a pasiante uh biakna a piate khempeuh ading a kibangin a bawlsak hi. ^c

9 Ama tungah nih vei a kilaksa TOPA Israel Pasian kiang panin Solomon lungsim pial ta ahi manin ama tungah TOPA a heh hi. 10 Solomon in pasian dangte a zuih ding TOPA in kham napi Solomon in ama thupiak a zui kei hi. 11 Tua ciangin TOPA in Solomon kiangah, “Hih in nangma lungsim puak hi-a, nang kong thupiak ahi ka thukhunte, ka thukipte na zuih loh manin, na kumpigam nang kiang panin ka khenkham taktak dinga, na nuai-ate khat tungah ka pia ding hi. 12 Ahi zongin na pa David ka cihna in nang hun sungin ka hih kei ding hi. Na tapa khut panin ka balkham ding hi. 13 Ahi zongin ka nasempa David le keima teelsa Jerusalem ka khualna-in amah kiang panin kumpi-gam buppi ka khenkhamsak kei dinga amah beh khat ka pia ding hi,” a ci hi. ^d

Solomon Galte

14 Tua ciangin TOPA in Edom kumpi gui pana Edom-te Hadad, Solomon langah a pangsak hi. 15 A masa lai-a David le Edom-te a kido lai-in galkap mangpa Joab in misite vui dinga a pai-in Edom-a mi khempeuh a satpai hi. 16 Amaute in Edom-a mi khempeuh a suksiat khit mateng uh kha guk sung Joab le Israel-te khempeuh tua lai-ah a taam uh hi. 17 Ahi hangin Hadad naupang lai-a a pa nasem Edom-te ulian pawlkhat tawh Egypt ah a tai uh hi. 18 Amaute Midian panin paikhia uh a Paran a tung uh hi. Tua ciangin Paran panin mi tonpih uha Egypt ah pai-in Egypt kumpipa Pharaoh kiang tung uh a, amah in Hadad inn khat le leitang pia-in a annek ding a sik hi. ^e

19 Hadad tungah Pharaoh lungkim mahmah a, ama zi Kumpinu Tahpenes sanggamnu tawh a kitengsak hi. 20 Tahpenes sanggamnu in tapa khat nei in a min Genubath hi a, Tahpennes in kumpi-inn ah a kem hi. Tua lai-ah Pharaoh tate tawh Genubath a omkhawm hi.

21 Egypt ah Hadad a om laitakin David a pate tawh tawlnga khawm ta a, galkap mangpa Joab lah si ta cih thu a za hi. Tua ciangin Hadad in Pharaoh kiangah, “Ka gamah ka ciah theih nadingin kei hong phal in,” a ci hi.

22 Pharaoh in, “Na gam ah na ciah kik nadingin hih lai-ah bang kisapna nei na hi hiam?” ci-in a dong hi.

Hadad in, “Bangmah ka kisam kei hi, ahi zongin hong paisak hoh in!” ci-in a dawng hi.

23 Tuateh Pasian in Solomon langpan dingin a pu Zobah kumpipa Hadadezer kiang pana a tai Eliada tapa Rezon, a khangasak hi. 24 David in Zobah galhatna ^{▼▼11.24 Hebrew in amaute susia hi.} a suksiat ciangin amah in akim apama mite kaikhawma a lehdote makai khat a suak hi; a lehdote Damascus ah pai uh a, tua lai-ah tengin a uk uh hi. 25 Hadad lungkhamsakna behlapin Solomon nuntak sung teng Rezon in Israel a langpang hi. Tua ciangin Rezon in Aram ukin, Israel a hua mahmah hi. ^g

Jeroboam in Solomon Lehdo

26 Nebat tapa Jeroboam in zong kumpipa a lehdo hi. Amah Zeredah pana Ephraim-te, Solomon ulian khat hi-a, a nu meigong hi-in, a min Zeruah ahi hi. ^h

27 Amah in kumpipa a lehdona hih bang ahi hi: Solomon in a kipsakna leicial ^{▼▼11.27 Ahikeh Millo} bawl khin-a, a pa David khuapi kulh vangte a hu khin hi. 28 Tua lai-a a vaidingpi Jeroboam hi a, Solomon in tangvalpa nasep hoih a muh ciangin Joseph innkuan a nasem buppi a uksak hi. ^j

29 Tua hun lai-in Jerusalem pua ah Jeroboam paikhia in Shiloh a kamsangpa Ahijah in puantual thak khat silhin lampi ah amah a na dawntuah hi. Amaute gel bek gam pua ah a om uh hi. 30 Tuateh Ahijah in a puantual silh lai suahkhia in balkek a, bek sawm le nih a suah hi. 31 Tua ciangin Jeroboam kiangah, “Nang ading bek sawm la in, ahang in, TOPA, Israel Pasian in: En in Solomon khut panin a kumpi-gam ka balkhia dinga, nang beh sawmte kong pia ding hi. 32 Ahi hangin ka nasempa David le Israel beh khempeuh pana ka teelkhiat Jerusalem khuapi ka khualna-in amah in beh khat a tang ding hi. 33 Kei mah in hih ka sem ding hi, bang hang hiam cih leh amaute ^{▼▼11.33 Hebrew; Septuagint, Vulgate le Syriac amah} in kei hong taisan uh a, Sidonte nusian Ashtoreth, Moab-te pasian Chemosh le Ammon-te pasian Molech-te bia -in, ka lampite zui lo uh a, ka muhna ah amaanin gamta loin, Solomon pa David zuih bangin ka ngeina kipte le ka thukhunte a zui kei uh hi.

34 “‘Ahi hangin Solomon khut panin kumpi-gam bup ka laksak kei ding hi; ka nasempa David, ka teelpa, ka thupiakte le ka ngeina kipte a zuipa ka khualna-in a nuntak sung teng amah ka uksak ding hi. 35 A tapate khut panin kumpi-gam ka laksak dinga, nang beh sawmte kong pia ding hi. 36 Ka nasempa David in ka Min koih nadinga ka teelna Jerusalem a ka mai-ah meivak khat a neih den theih nadingin ama tapa beh khat ka pia ding hi. 37 Ahi hangin nang na hileh, kong la ding a, amaute khempeuh tungah na ut bangbangin na uk ding hi; Israel tungah kumpi na suak ding hi. 38 Nang in kong sawl peuhpeuh hih a, ka lampite tawnin ka nasempa David hih bangin ka ngeina kipte le ka thupiakte zuihna tawh ka mit muhna ah amaanin na gamtat leh nang kong ompih ding hi. David adingin ka kipsak bangin na ukna ka kipsak dinga, nang tungah Israel kong pia ding hi. 39 Hih thu hangin David suante ka niamkhiat dinga, ahi zongin a tawntung ahi kei ding hi,’ ci hi,” a ci hi. ^l

40 Solomon in Jeroboam thah sawma, ahi hangin Jeroboam Egypt ah tai-in kumpi Shishak beel a, Solomon a sih dong tua lai-ah a om hi. ^m

Solomon Sihna

41 Solomon uk sunga adang thupiangte tawh kisai - a sep khempeuh le a lahkhiat pilna teng - Solomon tangthu ciamtehna sungah kigelh hi lo ahi hiam? 42 Solomon in Jerusalem ah Israel khempeuh kum sawmli sung a uk hi. 43 Tua ciangin a pate tawh tawlnga-a a pa David khuapi ah kivui hi. Tuateh a tapa Rehoboam in a za luah a kumpi a suak hi. ⁿ